Lai Baibal Caholh Dirnak

Lai Baibal Caholh cu Mirang in Lai Biblical Literature a si. A bitnak in le sang hlei thiam pawl fianternak in, caholh chungah lenhloi, biazai, le drama phun lawng an itel. Cucaah, “Baibal Caholh ti cu a si thiam maw?” tiah bia halnak a um kho.  A fawinak in, a si kho ko. Mirang “literature” cu Latin biafang “litteratura” in a ra. Litteratura sullam cu “ṭialmi (writing),” “grammar,” le “cawnnak, learning” tinak a si.  A bifang hram ngai cu litterus a si. Latin Baibal nih “litteras” tiah oi 22 a hman. Biakam Hlun hmun tampi ah litteras cu ṭialmi ca (documents), cakuat (letters) le siangpahrang min in thanh mi ca (decrees) an si. Mirang Baibal (ESV) nih “literature” tiah Daniel 1:4 lawngah a leh. Lai Baibal nih “ca” tiah a leh. “Litteras” cu Biakam Thar ah leiba cazin (Luka 16:7) le Cathiang (Johan 7:15) tinak a si. Zoh dawh taktak in Latin Baibal nih “sacras litteras” (Ca Thiang; 2 Timote 3:15) ti a hman. Cucaah, Baibal cu caholh thiang (sacred literature) a si. Baibal Caholh ti cu dotla a si ko.

English Standard Version nih “literature” oi khatte a hman chap. Cu hmun ah Latin Baibal nih a hman mi biafang cu “libro” a si; “cauk” tinak a si. Daniel 1:17 ah a si. Siangpahrang tuah mi program chungtel mino lak ah Daniel le a phun hawi pathum cu Pathian “ca lei fimnak le hngalhnak le thiamnak phun kip kha a pek hna.” Hi Judah mino pali cu miram dang, an chan ram lianngan ah, minung ah an ichuak khawhnak cu Pathian a si. Minung ichuahnak ca ah Pathian nih a pekmi hna list hi zohhmanh; “ca lei fimnak” in aa thawk hih. Lairam ah bisakut lawng a chuak. Aalu hmanh a vui set lo. “Kokek thil mansung tampi kan ngei lo” an ti. Fimnak, hngalhnak, le zungthiamnak in ithuam u si. Miram dang, miphun dang lakah minung ah kan ichuah ve ko lai. Kan ngeih lomi taktak cu cawnnak hmun le caan ṭha a si. Dawn khantu dang pakhat cu hmun hma a si. Cauk kan chuak tikah khuaza van toi ah a ummi kan phun hawi sinah kuat a har tuk. Hi dawnkhantu vialte lawnhtak in Lai Baibal Caholh cu online cawnnak le eBook chuahnak phu si ding ka saduhthah a si. 

Caholh cu vawlei chanbia ah a phunphun in an hman. Biakam Hlun hmanh ah mi hlennak (1 Sia 21:8), siangpahrang cakuat (2 Sia 5:5), le miphun luatnak (Est 8:8) ah an hman. Ca le holh sinah miphun cu an ṭhangcho i an ṭumchuk. Mah ca le holh a ṭanh mi miphun cu an ṭhangcho. Caan nih a hloh hna hnu zongah an lung phun le lung ca nih vawlei chanbia ah an nehnang a hmuhter. Lai Baibal Caholh nih aa timh mi cu Baibal Caholh le vawlei thiamnak karhter in Lai miphun ṭhanchonak lam pakhat te si ve ding a si. Cu, kan Laimi zong “Ui nih kan ca a ei” tiah imaimilh kan hau lai lo. Kan caholh sinah kan ṭang lai i kan ṭhang.

Lai Baibal Caholh website cu Lai holh in Baibal lei le vawlei lei fimnak le thiamnak cawnnak caah kan ser. A cawng zuam poah zalong tein cawn khawhnak hmun a si lai. Free course an um lai. Cun, man pek hua mi course an um lai.